Նալբանդյանն ընդունել է Միացյալ Թագավորության փոխարտգործնախարարին

Ողջունելով հյուրին` նախարար Նալբանդյանը նշել է, որ առավել քան քսանամյա դիվանագիտական հարաբերությունների պատմության արդյունքում կողմերի միջև համագործակցությունը կայուն հիմքերի վրա է դրվել, և կա երկկողմանի շահագրգռվածություն` այն էլ ավելի խորացնելու և ընդլայնելու:

Շնորհակալություն հայտնելով ընդունելության համար՝ փոխնախարար Ֆրեյզերը նշել է, որ գնալով աճում է Միացյալ Թագավորության հետաքրքրվածությունը Հայաստանի հետ տարբեր բնագավառներում փոխգործակցության սերտացմամբ, և իր այցը ևս մեկ քայլ է այդ ուղղությամբ:

Հանդիպման ընթացքում քննարկվել են Հայաստան-Եվրամիություն հարաբերությունները:

Անդրադարձ է կատարվել միջազգային և տարածաշրջանային մի շարք կարևոր խնդիրների: Նախարար Նալբանդյանը հյուրին ներկայացրել է Լեռնային Ղարաբաղի հակամարտության կարգավորման գործընթացի վերջին զարգացումները, իսկ փոխնախարար Ֆրեյզերը իր հերթին նշել, որ Միացյալ Թագավորությունը խնդրի լուծումը տեսնում է միայն խաղաղ ճանապարհով և աջակցում է ԵԱՀԿ Մինսկի խմբի համանախագահների կողմից ձեռնարկվող ջանքերին: