Ընտրությունների միջոցով իշխանություններին հաղթելն անհնար է. քաղաքագետ

Ընդդիմություն-իշխանություն փոխհարաբերությունները ՌԱՀՀԿ փորձագետ, քաղաքագետ Էդգար Վարդանյանը համեմատում է ֆուտբոլային խաղի հետ, որտեղ ընդդիմությունը խաղում է առաջին համարով, իսկ արձագանքողը` պաշտպանվողը, իշխանությունն է:

«Այն, ինչ եղավ հանրապետության երկրորդ քաղաքում եւ շատ այլ բնակավայրերում, որտեղ 70-30 հարաբերակցությամբ հաղթեց ընդդիմությունը, ցույց է տալիս, որ ժողովուրդը գնահատում եւ ընդունում է ընդդիմության ղեկավարին եւ մեծ մասամբ չի ընդունում իշխանությանը, չի ճանաչում նրա լեգիտիմությունը»,- այսօրվա ասուլիսում ասաց Էդգար Վարդանյանը:

Քաղաքագետ Ալեքսանդր Մարգարովն էլ այն կարծիքին է, որ, 1995-1996 թթ. սկսած, մենք ականատես ենք լինում բեմադրված ընտրությունների. «Պարզ է դառնում, որ այս իշխանություններին չի կարելի հաղթել ընտրությունների միջոցով»: Ընդդիմությունը, քաղաքագետի խոսքերով, հայտնվել է «խաղից դուրս» իրավիճակում. «Անակնկալ տեղի չի ունեցել իշխանությունները ձգտելու էին հաղթել առաջին փուլում, ինչը եւ եղավ»: