ԱԶԳ. Ռուսաստանի աջակցությունը Կիպրոսին անգնահատելի է

Ռուսաստանի աջակցությունը Կիպրոսին անգնահատելի է. նշել է Կիպրոսի նախագահ Խրիստոֆիասը: Այդ մասին երեկ տեղեկացրեց «Եվրոնյուզի» թուրքական տարբերակ «Աբհաբերը»:

Ըստ տեղեկության` Կիպրոսի նախագահ Դմիտրիս Խրիստոֆիասը, մասնակցելով Կիպրոս-Ռուսաստան բարեկամության միության 50-ամյակի առթիվ կազմակերպված միջոցառմանը, գոհունակությամբ է արտահայտվել երկու երկրների հարաբերություններին այս միության բերած նպաստի վերաբերյալ: Նա նշել է, որ Կիպրոսը տարածաշրջանում առեւտրի կարեւոր կենտրոն է, ռուս գործարարներն այնտեղ ներդրումներ են անում, 50 տոկոսով աճել է Կիպրոս այցելող ռուս զբոսաշրջիկների թիվը, եւ ներկայումս Կիպրոսում բնակվում են ավելի քան 60 հազար ռուսներ:

Նախագահ Խրիստոֆիասը ելույթում անդրադարձել է նաեւ ՌԴ նախագահ Դմիտրի Մեդվեդեւի 2010-ին իրականացրած Կիպրոս այցելությանը, որի ընթացքում կողմերի ընդունած 2010-2013 թթ. ընդգրկող համատեղ գործողության ծրագրին, ապա նշել է Կիպրոսի հիմնահարցի կարգավորման գործում ռուսական կառավարության դրական դերը եւ ընդգծել է, որ Ռուսաստան` որպես ՄԱԿ-ի Անվտանգության խորհրդի մշտական անդամ, հետեւողականորեն պաշտպանում է Կիպրոսի Հանրապետության ինքնիշխանությունը, տարածքային ամբողջականությունն ու ազատությունը, հետեւաբար նրա աջակցությունն անգնահատելի է: