Լուրջ կասկածներ կան, որ Իրանի միջուկային ծրագիրն այնքան էլ խաղաղ չէ

Ատոմային էներգետիկայի միջազգային կազմակերպությունը հաջորդ շաբաթ ծրագրում է հրապարակել նախկինում փակ համարվող տեղեկատվությունը Իրանի միջուկային ծրագրի մասին:

Associated Press գործակալությունը, վկայակոչելով անանուն դիվանագիտական աղբյուրներ, տեղեկացնում է, որ զեկույցում, մասնավորապես, նշված է, որ Իրանը իրականացրել է միջուկային մարտագլխիկների համակարգչային մոդելավորում: Բացի այդ` ցուցադրվելու են արբանյակային լուսանկարներ` ենթադրաբար մեծ պողպատե կոնտեյների, որը նախատեսված է միջուկային զենքի պայթուցիկ նյութերի փորձարկումների համար:

Reuters գործակալության տվյալներով` լուսանկարված կոնտեյները գտնվում է Թեհրանի մոտակայքում` Պարչին ռազմական համալիրում:

Associated Press-ի անանուն աղբյուրները հայտարարել են, որ Ատոմային էներգետիկայի միջազգային կազմակերպությունը լուրջ կասկածներ ունի, որ Իրանի միջուկային ծրագիրն այնքան էլ խաղաղ չէ:

Իրանը պաշտոնապես չի արձագանքել գործակալության տեղեկատվությանը: