ՀԱԷԿ-ի մասին թուրքական տեղեկատվությունը իրականությանը չի համապատասխանում

Թուրքիան պարբերաբար տեղեկատվություն է տարածում Հայկական ատոմակայանի վտանգավորության մասին, սակայն դա ոչ մի ընդհանուր բան չունի իրականության հետ. Regnum գործակալությանը հայտնել են Հայաստանի էներգետիկայի եւ բնական պաշարների նախարարությունում:

Նշվել է, որ ՀԱԷԿ-ը Ատոմային էներգետիկայի միջազգային գործակալության հսկողության տակ է, եւ մինչ օրս ոչ մի միջազգային կազմակերպություն հարց չի բարձրացրել, թե այն սպառնալիք է տարածաշրջանի համար:

Վանի ավերիչ երկրաշարժից հետո Թուրքիան տեղեկություններ տարածեց, թե ՀԱԷԿ-ից արտահոսք է եղել, սակայն հետագայում պարզվեց, որ դրանք կեղծ լուրեր են: Այնուհետեւ Թուրքիան դիմեց Ատոմային էներգետիկայի միջազգային կազմակերպությանը, որտեղից պատսախանեցին, որ ՀԱԷԿ-ի վերաբերյալ իրենց հետաքրքրող հարցերի պատասխանները կարող են գտել կազմակերպության պաշտոնական կայքէջում:

Սակայն այսօր դարձյալ Թուրքիայի էներգետիկայի նախարարը հայտարարել է, որ դիմելու են Ատոմային էներգետիկայի միջազգային կազմակերպությանը` ՀԱԷԿ-ը փակելու պահանջով: