Ուղեւորություններ ծրագրելիս հաշվի առեք Ղարաբաղյան հակամարտությունը

ՌԴ ԱԳՆ պաշտոնական ներկայացուցիչ Ալեքսանդր Լուկաշեւիչն այսօր ճեպազրույցի ժամանակ մեկնաբանել է միջադեպը, որը տեղի է ունեցել Ռուսաստանի` հայկական ազգանունով քաղաքացու հետ, որին չեն գրանցել Մոսկվա-Բաքու չվերթին. տեղեկացնում է Regnum գործակալությունը:

«Դեպքի կապակցությամբ առնվազն ափսոսանք է պետք հայտնել»,- ասել է նա:

Լուկաշեւիչը նշել է, որ Հայաստանի եւ Ադրբեջանի կողմից այդ երկրների քաղաքացիների մուտքը խոչընդոտվում է Ղարաբաղյան հակամարտության, նաեւ դիվանագիտական հարաբերությունների բացակայության պատճառով:

«Այդ կապակցությամբ խորհուրդ ենք տալիս քաղաքացիներին հաշվի առնել այդ հանգամանքը ուղեւորություններ ծրագրելիս»,- նշել է ՌԴ ԱԳՆ մամուլի խոսնակը` հավելելով, որ միջադեպը մեծ արձագանք գտել լրատվամիջոցներում:

Հոկտեմբերի վերջին ՌԴ քաղաքացի Սերգեյ Գյուրջյանին Մոսկվայի «Դոմոդեդովո» օդանավակայանում թույլ չեն տվել թռչել «Ադրբեջանական ավիաուղիների» ինքնաթիռով հայկական ազգանունի պատճառով: