ՀՐԱՊԱՐԱԿ. Կալանավորել են նաեւ պարագլխի կնոջը

Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մխիթար Պապոյանը երեկ ուշ երեկոյան երկամսյա կալանք է կիրառել Քյարամ Ամոյանի, Ռուբեն Կարաօղլյանի եւ Արտուշ Հակոբյանի նկատմամբ:

Հիշեցնենք, որ նրանք սեպտեմբերի 23-ին Երեւանում վնասազերծված հանցագործ խմբի անդամներն են: Զինված խումբը վերջին երեք ամսում ավազակային հարձակումներ է կատարել պաշտոնյաների եւ գործարարների տների վրա, կողոպտել եւ թալանել նրանց:

Նույն դատարանի դատավոր Արմեն Բեկթաշյանը բանդայի պարագլուխ Արտուշ Հակոբյանի կնոջ` Մարիամ Հակոբյանի նկատմամբ նույնպես կիրառել է 40-օրյա կալանք: Վերջինս, որոշ տեղեկությունների համաձայն, որոնվում էր Վրաստանի ոստիկանության կողմից:

Նշենք, որ այս գործով բերման է ենթարկվել 16 մարդ, որից 4-ը երեկ կալանավորվել են: Իսկ պատահարի օրը փախուստի ժամանակ ժայռից վայր ընկավ եւ մահացավ «Եթում» մականունով 49-ամյա Գուրգեն Հայրապետյանը: