Պայթող փուչիկներ

Մինչ խաղողի բերքահավաքը գյուղնախարար Կարապետյանը հայտարարել էր, թե խաղող մթերող կազմակերպությունները պարտավորվել են խաղողի 1 կիլոգրամն ընդունել 130 դրամից ոչ պակաս գնով, իսկ վճարումները, ըստ նախարարության կազմած պայմանագրի, գյուղացուն պետք է կատարվեին 10 բանկային օրվա ընթացքում:

Սակայն մի շարք բնակավայրերի խաղողագործներ արդեն մտահոգություն են հայտնում ու ընդվզում, որ ոլորտը կարգավորող նախարարի խոսքը չի համապատասխանում իրականությանը: Ըստ նրանց` վերամշակող ընկերությունները պատճառաբանում են, թե հայտարարված գնով իրենք կարող են ընդունել միայն խաղողի հատուկ սորտեր, իսկ մյուս տեսակները գյուղացիներից փորձում են ձեռք բերել ավելի ցածր գներով: Ավելին` երբ գյուղացին համաձայնում է ընդունող կազմակերպությունների պահանջներին, վերջիններս նրանց հայտնում են, որ գումարն իրենք կվճարեն մինչեւ տարեվերջ: