ՉՈՐՐՈՐԴ ԻՆՔՆԻՇԽԱՆՈՒԹՅՈՒՆ. Չեն ցանկանում, որ ինստիտուտը վերածվի հիմնադրամի

Այսօր տեղի ունենալիք կառավարության նիստում նախատեսվում է Երևանի ֆիզիկայի ինստիտուտը վերակազմավորել հիմնադրամի: Ամենայն հավանականությամբ, ինստիտուտը հիմնադրամի վերածելու նախագիծն ընդունվելու է` չնայած ինստիտուտի կորիզը` ավելի քան 15 դոկտոր և պրոֆեսոր, դեմ է արտահայտվել այդ նախագծին:

Նախագծին դեմ չի արտահայտվել միայն ինստիտուտի տնօրեն Աշոտ Չիլինգարյանը, ով էլ հենց պետք է նշանակվի ստեղծվելիք հիմնադրամի գործադիր մարմնի ղեկավարի ժամանակավոր պաշտոնակատար:

Ֆիզիկայի ինստիտուտի առաջատար գիտաշխատող Արա Սեդրակյանը «ՉԻ»-ի հետ զրույցում տեղեկացրեց, որ իրենք դեմ են այդ նախագծին, քանի որ ինստիտուտը հիմնադրամի վերածելուց հետո գրեթե մասնավոր սեփականություն է դառնում, իսկ ներկայիս ինստիտուտն էլ տնօրինելու են հիմնադրամի խորհրդի անդամները, այսինքն` գիտնականները  ընդունող որոշումների վրա որևէ ազդեցություն չեն ունենալու:

«Եթե այդ հիմնադրամը վաղը որոշի, որ ինստիտուտը պետք է ֆիզիկան թողնի և աղբ արտադրի, ոչ մի գիտնական չի կարողանալու ոչ մի բան անել»,- նշեց Սեդրակյանը` հավելելով, թե ինստիտուտը հիմնադրամի վերածելու որոշումը կայացվել է առանց գիտնականների հետ խորհրդակցելու: