Ափսոսում է, որ մայրաքաղաքի մասին օրենք չի մշակել

Yerkir.am-ի հարցին, թե պաշտոնավարման 4 տարիների ընթացքում ի՞նչ սխալներ է թույլ տվել քաղաքապետը, այսօր հրավիրած մամուլի ասուլիսի ժամանակ Ստեփանակերտի քաղաքապետ Վազգեն Միքայելյանը պատասխանել է, որ սխալներ չի կարող նշել, բայց կան ծրագրեր, որոնք չի հասցրել կատարել, ինչի համար շատ է ափսոսում։

Ըստ նրա` ամենահիմնականը, որ չի արվել, մայրաքաղաքի մասին օրենք չեն հասցրել մշակել ու ներկայացնել կառավարության ու Ազգային ժողովի քննարկմանը։ Իսկ ամենամեծ ձեռքբերումը քաղաքապետը համարում է մայրաքաղաքի պատմության մեջ առաջին անգամ բնակիչներին մշտական ջրով ապահովելը։

Խոսելով մեկնարկած ծրագրերի՝ ջրամատակարարման, բազմաբնակարան շենքերի տանիքների վերանորոգման, ծայրամասային փողոցների բարեկարգման, պատերազմից տուժած բնակարանների վերանորոգման մասին, նա համոզմունք է հայտնել, որ դրանք ծրագրված ժամկետներում ավարտին կհասցվեն, քանի որ, ըստ նրա, նախադրյալները կան։

Քաղաքապետը միաժամանակ հույս է հայտնել, որ այսուհետ Ստեփանակերտը լինելու է ավելի գեղեցիկ, բարեկարգ, կանաչապատ եւ հարմարավետ։