Վերջ "ա՜խ, մեջքս" արտահայտությանը

Ռոջեր Հարթլիի գլխավորությամբ` Կորնելի համալսարանի գիտնականները գտել են մարդկանց մեջքի ցավերից ազատելու հիանալի միջոց: Նրանք մշակել են արհեստական միջողնաշարային սկավառակներ, որոնք, գիտնականների կանխատեսումներով, շուկայում կհայտնվեն մոտակա 10 տարիների ընթացքում. տեղեկացնում է doctors.am-ը:

Սկավառակները պարունակում են բջիջներ, որոնք կլանում են ծանրաբեռնվածությունը: Նախնական ուսումնասիրությունները ցույց են տվել, որ փոխպատվաստման դեպքում դրանք գործում են այնպես, ինչպես իրականները: Սկավառակները դեռեւս փորձարկվել են միայն մկների վրա, որոնց փոխպատվաստվել են ոչխարների սկավառակներ: Սակայն ամերիկացի գիտնականները համոզված են, որ մեթոդը կաշխատի նաև մարդկանց դեպքում:

Ըստ գիտնականների` սկավառակներն արագ ադապտացվել են ողնաշարում, ինչը հնարավորություն է տվել լաբորատոր կենդանիներին ազատ կռանալ կամ վազել: Վիրահատությունից հետո նրանց պահվածքում փոփոխություններ չեն նկատվել:

Մեջքի ցավով տառապում են շատ մարդիկ, առավել ծանր դեպքերում վնասված սկավառակներն անհրաժեշտ է լինում հեռացնել: Վերականգնողական շրջանը նման դեպքերում կարող է տևել ամիսներ, բայց լրիվ շարժունակություն չի երաշխավորում: