Հայաստանը` Թուրքիայի եւ Ադրբեջանի լարած ծուղակում

«Արևելյան Թուրքիան գրավելու»` դպրոցականների կոչին նախագահ Սերժ Սարգսյանը տվել է քաղաքական պատասխան, մինչդեռ դա Թուրքիայի և Ադրբեջանի կողմից դիտվել է որպես պատմության սխալ, ինչը պետք է ուղղվի: Այսօր լրագրողների հետ հանդիպման ժամանակ քաղաքագետ Հրանտ Մելիք-Շահնազարյանը կարծիք հայտնեց, որ Սերժ Սարգսյանի խոսքը Թուրքիան և Ադրբեջանը օգտագործեցին իրենց միավորման համար:

«ՀՀ նախագահի ցանկացած խոսք, որը վերաբերում է Թուրքիային, նրանք պարզապես օգտագործում են և փորձում դարձնել քննարկման առարկա»,- նշեց քաղաքագետը:

Ինչ վերաբերում է մեր նախագահի պատասխանին` նա նշեց, որ նախագահի խոսքը բավական հավասարակշռված էր և առավել հիմնավորված:

«Նա ասել է, որ մենք պետք է ունենանք հզոր պետություն, այսինքն` անմիջական ագրեսիայի կոչ չի հնչել: Չի եղել նաև Սերժ Սարգսյանի կողմից հայտարարություն, թե մենք գրավել ենք Արցախը»,- մեկնաբանեց Շահնազարյանը` հավելելով, որ ՀՀ նախագահն ասել է, թե մենք պաշտպանել ենք մեր հայրենիքի մի հատվածը թշնամիներից, իսկ թուրքական կողմը նրա խոսքը ներկայացրել է այնպես, թե մենք գրավել ենք Ղարաբաղը, իսկ մնացածը պետք է գրավի երիտասարդ սերունդը:

Պերճուհի ԳԵՎՈՐԳՅԱՆ