Երեւան-Վան առաջին չվերթը` սեպտեմբերին

Երեւան-Վան  առաջին ուղիղ չվերթը հավանաբար կիրականացվի սեպտեմբերի 11-ին: Այսօր Երեւանում այդ մասին հայտարարվել է հայ եւ թուրք գործարարների եւ զբոսաշրջային գործակալությունների ներկայացուցիչների հանդիպման ժամանակ:

Հայաստանի արդյունաբերողների եւ գործարարների միության ղեկավար Արսեն Ղազարյանը տեղեկացրել է, որ թռիչքի իրականացման համար տեխնիկական եւ իրավական որեւէ խնդիր չկա. մնում է միայն թուրքական իշխանությունների հետ համաձայնություն ձեռք բերվի:

«Այս թռիչքն այնքան կարճ է, որ դրա համար կօգտագործվեն միջին ծավալի ինքնաթիռներ, ուստի եղած թռիչքուղին կբավականացնի»,- ասել է նա:

Վանի Առեւտրաարդյունաբերական պալատի խորհրդի անդամ Աբդուլլահ Թունջդեմիրն էլ ասել է, որ միջազգային թռիչքների սպասարկման նպատակով Վանի օդանավակայանում արդեն կառուցվում է նոր տերմինալ: