Ռուսաստանը երկու գյուղ է նվիրել Ադրբեջանին

ՌԴ նախագահ Դմիտրի Մեդվեդեւը Ադրբեջանին է հանձնել Ռուսաստանին պատկանող Սամուր գետի մի հատվածը  եւ Դաղստանի Մագարամկենտի շրջանից երկու գյուղ` 600 լեզգիական բնակչությամբ: Ահա այսպես է ձեւավորվել Ռուսաստանի եւ Ադրբեջանի նոր սահմանը: Այս մասին գրում է newsland.ru կայքը:

Հոդվածի հեղինակ Յուրի Ֆիլատովը գրում է, թե ահա սա էր նախագահ Մեդվեդեւի` դեռեւս նախորդ տարվա սեպտեմբերի 3-ին Բաքվում ստորագրած ռուս-ադրբեջանական սահմանի վերաբերյալ արձանագրության արդյունքը:

Տարածքների հանձնման վերաբերյալ ՌԴ արտաքին գործերի փոխնախարար Գրիգորի Կարասինը հայտարարել է, թե դաղստանյան անկլավի հանձնումը արվել է հանուն բարեկամության եւ համագործակցության: Սակայն ռուս քաղաքագետներն ու վերլուծաբանները ծիծաղելի են համարում այդ արդարացումը:

Ինչ վերաբերում է հենց լեզգիներին, ապա նրանք վստահ են, որ Ռուսաստանն իրենց փոխանակել է գազի հետ. 600 բնակչությամբ գյուղերի դիմաց Ռուսաստանը պետք է մեծացնի իր երկիր գազի մատակարարման ծավալները եւ ավելի ցածր գներով: