Օբամային վիրավորելու համար ազատվել է աշխատանքից

Ամերիկյան MSNBC հեռուստաալիքը երեկ աշխատանքից ազատել է իր առաջատար քաղաքական մեկնաբաններից մեկին` Մարկ Հալպերինին` ուղիղ եթերում նախագահ Օբամայի հասցեին հնչեցրած վիրավորական արտահայտության համար. տեղեկացնում է New York Times-ը:

Ամեն շաբաթ հեռարձակվող Morning Joe հաղորդման ժամանակ քաղաքական մեկնաբանը, ժպտալով եւ փողոցային բառապաշար կիրառելով, մեկնաբանել է Օբամայի պահվածքը մեկ օր առաջ տեղի ունեցած ասուլիսի ժամանակ:

Իհարկե, մի քանի րոպե անց, նա ներողություն է խնդրել, սակայն մեկուկես ժամ անց հեռուստաալիքի ղեկավարությունն արտակարգ նիստ է անցկացրել ու որոշել «անորոշ ժամանակով» Հալպերինին ազատել իր պարտականությունների կատարումից:

«Մարկ Հալպերինի մեկնաբանությունները բացարձակապես անընդունելի են եւ անթույլատրելի: Մենք ներողություն ենք խնդրում նախագահից, Սպիտակ տնից եւ մեր հեռուստադիտողներից: Մենք ձգտում ենք բանավեճի բարձր մակարդակի, եւ նման մեկնաբանությունները տեղի չպիտի ունենան եթերում»,- ասվում է MSNBC հայտարարության մեջ:

Քաղաքական մեկնաբանն ընդունել է քննադատությունը: