ՀԱՅՈՑ ԱՇԽԱՐՀ. Պարզունակ աղավաղում

Արտգործնախարար Էդվարդ Նալբանդյանը երեկ Ստրասբուրգում լրագրողների հետ հանդիպման ժամանակ անդրադարձել է ԵԽԽՎ նախագահ Մեւլութ Չավուշօղլուի օրերս արած հայտարարությանը, թե հայ-թուրքական հարաբերությունների կարգավորումը կապված է Ղարաբաղյան խնդրի կարգավորման հետ եւ այդ մասին իբր թե բանավոր համաձայնություն է եղել Թուրքիայի եւ Հայաստանի միջեւ, ինչը նաեւ հաստատվել է այլ երկրների արտգործնախարարների կողմից:

Նախարարը, մասնավորապես, նշել է. «Դա, իհարկե, պարզունակ աղավաղում է: Հայ-թուրքական հարաբերությունների կարգավորման գործընթացը սկսվել եւ ընթացել է այն փոխադարձ պայմանավորվածությամբ եւ հասկացությամբ, որ գործընթացը պետք է ընթանա առանց նախապայմանների եւ դա էր նաեւ պատճառը, որ արձանագրության մեջ որեւէ նախապայման չկա»: