Կարսի արձանի ապամոնտաժումը դադարեցվել է

Կարսի` հայ-թուրքական բարեկամությանը նվիրված արձանի ապամոնտաժումը դադարեցվել է բանվորներին ժամանակին աշխատավարձ չվճարելու պատճառով:

Ինչպես տեղեկացնում են թուրքական ԶԼՄ-ները, Կարսի քաղաքապետ Նեւզաթ Բոշքուշը հայտարարել է, որ քաղաքապետարանը աշխատանքներն իրականացնող ընկերությանը վճարել է 172 հազար լիր, իսկ մնացած 100 հազարն էլ պետք է վճարեն աշխատանքների ավարտից հետո:

«Կապալառու ընկերության հետ պայմանագրով` արձանի ապամոնտաժումը պետք է ավարտվի մինչեւ հունիսի 24-ը: Նշված ամսաթիվը վերջնաժամկետն է: Մնացած հարցերը մեզ չեն վերաբերում: Պայմանագրի համաձայն` վերջնահաշվարկը կատարվելու է աշխատանքների ավարտից հետո»,- ասել է քաղաքապետը:

Հիշեցնենք, որ արձանն ապամոնտաժվում է Թուրքիայի վարչապետ Էրդողանի կարգադրությամբ, որը այն «այլանդակ» էր անվանել: Որոշ տեղեկություններով` դա կատարվում է Ադրբեջանի նախագահ Իլհամ Ալիեւի պատվերով: