Արտահոսք` թափոնատարից

Զանգեզուրի պղնձամոլիբդենային կոմբինատի թափոնատարի վթարի հետեւանքով տեղի է ունեցել պոչերի արտահոսք, որոնք ողողել են կիրճը եւ կուտակվել հորում, որը Շղարշիկ բանավանի բնակիչ Վլադիմիր Մկրտչյանը փորել էր ձկնաբուծության համար:

Ըստ «Էկոլուրի»` վթարը տեղի է ունեցել մայիսի 8-ի գիշերը ու տեւել մի քանի ժամ: Կոմբինատի աշխատակիցները եւ բնապահպանական պետական տեսչության Սյունիքի տարածքային բաժնի պետ Լեւոն Պետրոսյանը փորձել են կանգնեցնել պոչերի արտահոսքը: Մինչեւ ժամը 13:00-ը արտահոսքը թուլացել է, բայց հողն արդեն թունավորված է եղել կոնցենտրատով: Այնտեղ այլեւս հնարավոր չէ զբաղվել ինչպես ձկնաբուծությամբ, այնպես էլ գյուղատնտեսությամբ:

Հիշեցնենք, որ 2010թ. նոյեմբերին կոմբինատի թափոնատարում տեղի ունեցած վթարի հետեւանքով պոչերը լցվել էին Ողջի գետ: Այն ժամանակ բնապահպանական պետական տեսչությունը վնասը գնահատեց 650 հազար դրամ, իսկ տուգանքի չափը սահմանվեց 100 հազար դրամ: