Քուրդ կանայք նստացույց են անում

«Շեհիդները չեն մեռնում»,- այս վանկարկումներով քուրդ կանայք իրենց զոհված որդիների նկարները ձեռքներին քայլերթ, այնուհետեւ նստացույց են անում Վանում: Մայիսի 8-ը Թուրքիայում նշվում է որպես կանանց եւ մայրերի տոն. այս կանայք էլ կոչ են անում դադարեցնել իրենց որդիների սպանություններն ու թուրք-քրդական բախումները:

«Սթար»-ի լրագրողներից Ալի Իզմիրը բացատրում է, որ քրդերի հիմնական պահանջներն են` մայրենի լեզվով կրթություն ստանալը,  ինքնության պահպանման հնարավոր պայմանների ապահովումն ու ինքնավարություն ստանալը:

Բողոքի այս ակցիային մասնակցում են նաեւ մեծաթիվ քուրդ պաշտոնյաներ` Վանի քաղաքապետը, «Խաղաղություն եւ ժողովրդավարություն» կուսակցության առաջնորդները, «Դեմոկրատական հասարակություն» կուսակցության պատգամավոր Այսել Թուլուքը:

Վերջինս լրագրողներին պատմում է. «Այս ամենի արդյունքում հիմնականում երեխաներ են սպանվում: Վերջերս Դիարբեքիրում հինգ երեխա է սպանվել ոստիկանների կողմից»: