Մաքուր բերդաքաղաք

Մաքուր եւ կանաչապատ մայրաքաղաք ունենալու` Երեւանի քաղաքապետարանի կոչին, ինչպես նաեւ ապրիլի 18-ին նշվող Հուշարձանների եւ տեսարժան վայրերի միջազգային օրվան ընդառաջ այսօր «Էրեբունի» պատմահնագիտական արգելոց-թանգարանի Էրեբունի, Շենգավիթ եւ Կարմիր բլուր հնավայրերի տարածքում մաքրման եւ այլ աշխատանքներ են իրականացրել մայրաքաղաքային զորամասի 4-րդ գնդի զինվորները:

Թանգարանի լրատվական բաժնից «Երկիր»-ին հայտնեցին, որ նախորդ տարիներին ՀՀ պաշտպանության նախարարության եւ արգելոց-թանգարանի միջեւ ձեւավորված գեղեցիկ համագործակցությունը պայմանավորված է ինչպես Հայաստանի պատմամշակութային հուշարձանների մշտական խնամքի և դրանց տարածքների բարեկարգման անհրաժեշտությամբ, այնպես էլ հայրենիքի պաշտպանների դաստիարակության գործում պատմամշակութային արժեքների դերով:

«Պատմամշակութային հուշարձաններն ու վայրերը թանկ են եւ անփոխարինելի, որովհետեւ դրանք նույնանում են հայրենիքի հետ: Կասկածից վեր է, որ ժառանգությունը հզոր ռեսուրս է ժամանակակից երիտասարդի եւ հայրենիքի զինվորի բարոյական կերպար ձեւավորելու ճանապարհին»,- զինվորներին ասել է արգելոց-թանգարանի տնօրեն Գագիկ Գյուրջյանը: