Սամսոն Խաչատրյանը` քաղաքական ռինգում

Վանաձորի ՀԱԿ անդամները Հայքի հրապարակում բողոքի ակցիա են կազմակերպել` պահանջելով ազատ արձակել վանաձորցի, աշխարհահռչակ բռնցքամարտիկ Սամսոն Խաչատրյանին:

Հիշեցնենք, որ նրան Երևանի «Դինամո» մարզադահլիճի հարակից տարածքից ձերբակալել էին մարտի 13-ի երեկոյան:

Թե' ՀԱԿ Վանաձորի տարածքային գրասենյակի ղեկավար Աշոտ Մանուկյանը, թե' ՀԱԿ վանաձորաբնակ ակտիվիստները համոզված են, որ ձերբակալման դրդապատճառը Ս. Խաչատրյաի քաղաքական ընդդիմադիր հայացքներն են:

Ամենայն հավանականությամբ, ձերբակալություն նպատակ ունի հնարավորինս կանխել մարտի 17-ին մայրաքաղաքում կայանալիք մեծ հանրահավաքին լոռեցիների մասնակցությունը, ինչը բռնցքամարտիկը կարող էր ակտիվորեն կազմակերպել: Հենց մարտի 1-ին կայացած հանրահավաքին Ս. Խաչատրյանի ունեցած ակտիվ մասնակցությունն է նրա ձերբակալման հիմնական պատճառը:

«Ազատություն» վանկարկումներով և կոչերով ակցիայի մասնակիցները հրապարակից  երթով շարժվել են դեպի Լոռու մարզի դատախազություն, հանդիպել են մարզի դատախազ Կարեն Շահբազյանի հետ եւ իրենց համաքաղաքացուն ազատ արձակելու գրավոր պահանջ ներկայացրել նրան:

Տեղեկությունների համաձայն` նմանատիպ ակցիա-երթ նախատեսվում է նաև վաղը: