"Նաիրին"` Չեխիայում

Չեխիայի Հանրապետությունում գործող «Հայկական տուն» ՀԿ-ն եռամյա դադարից հետո` 2011 թ. մայիսից, կսկսի վերահրատարակել «Նաիրի» հասարակական-մշակութային երկլեզու (չեխերեն եւ հայերեն) ամսագիրը` երկու ամիս պարբերականությամբ:

Ինչպես «Երկիր»-ին Պրահայից հայտնեց ամսագրի խմբագիր Էդուարդ Սարկիսյանը, թեեւ ամսագրի առաջին համարը լույս է տեսնելու մայիսին, ապրիլի 1-ից «Նաիրին» իր ընթերցողներին կներկայանա համացանցում` www.nairi.webnode.cz կայքով:

Ամսագիրն իր առջեւ նպատակ է դրել Չեխիայի բնակչությանը ներկայացնել հայ ժողովրդի մշակույթը, ավանդույթները, պատմությունը, մասնավորապես պատրաստվում է բավարար տեղեկատվություն ապահովել Օսմանյան կայսրությունում 1915-1918 թվականներին կազմակերպված Հայոց ցեղասպանության վերաբերյալ:

Ավելին, ըստ Էդուարդ Սարկիսյանի, «Նաիրին» աշխատանքներ կիրականացնի, որ Չեխիայի խորհրդարանը նույնպես քայլեր կատարի Հայոց Մեծ եղեռնը պաշտոնապես ճանաչելու ուղղությամբ:

Իր ընթերցողներին ամսագիրը պարբերաբար որակյալ տեղեկատվություն կներկայացնի նաեւ Լեռնային Ղարաբաղի մասին, ինչպես նաեւ կաջակցի Չեխիայում ապաստանած մեր հայրենակիցների ինտեգրմանը: