Գնաճը զսպելու մեխանիզմներ են մշակում

Անբարեխիղճ գործարարների հարստանալու ձգտումները սանձելու համար փոփոխություններ են արվելու տնտեսական մրցակցության պաշտպանության մասին օրենքում, որը երկրորդ անգամ ընթերցվելու է ԱԺ հաջորդ քառօրյայի ընթացքում:

Այսօր լրագրողների հետ հանդիպման ժամանակ ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գագիկ Մինասյանն ասաց, որ սա ՀՀ-ում գնաճը զսպելու առաջին մեխանիզմն է:

Երկրորդը կառավարության կողմից ԱԺ-ին ներկայացվելիք նոր օրենքի նախագիծն է: Դրա համաձայն` եթե առաջին անհրաժեշտության որեւէ ապրանքի գինը մեկ ամսվա ընթացքում 30 տոկոսով աճում է, ապա կառավարությունը լիազորված է 90 օրվա ընթացքում ինքնուրույն սահմանել այդ ապրանքի գինը:

«Սա վերաբերում է այն ապրանքներին, որոնց բնագավառում ունենք անբարեխիղճ մրցակցություն: Կան սպեկուլյանտներ, որոնք, օգտվելով աժիոտաժից, իրենց գնային քաղաքականությունն իրականացնում են բիզնեսի օրենքներից դուրս»,- նշեց Գ. Մինասյանը: