Բեքհեմը չի ցանկանում պարապ նստել

«Լոս Անջելես Գալաքսիի» կիսապաշտպան Դևիդ Բեքհեմը հաստատել է, որ մտադիր է ամբողջությամբ կենտրոնանալ MLS-ի նոր մրցաշրջանի  վրա: Հիշեցնենք, որ 35-ամյա ֆուտբոլիստը վերջերս կարող էր վարձակալության հիմունքներով տեղափոխվել «Տոտենհեմ», սակայն ակումբներն, ի վերջո, համաձայնության չեկան:

«Հիմա իմ միակ նպատակը մրցաշրջանին լավ նախապատրաստվելն է: Կցանկանայի շնորհակալություն հայտնել «Տոտենհեմին» և Հարի Ռեդնապին անձամբ այն բանի համար, որ թույլատրեցին իրենց հետ մարզվել, ինչպես նաև իմ նկատմամբ ցուցաբերած հետաքրքրության համար: Եթե խաղալու հնարավորություն լիներ, ես մեծ սիրով ելույթ կունենայի, այլ ոչ թե պարապ կնստեի: Բայց կարիերայիս այս շրջանում, հաշվի առնելով վնասվածքս, ես որոշեցի ավելի շատ ժամանակ հատկացնել մարզումներին»,- Բեքհեմին մեջբերում է The Sun-ը: