ԱԶԳ. Ծառերը դարձել են "մահապարտ"

Վերջերս «Ազգ» օրաթերթը «Մանկապարտեզի տեղում 16-հարկանի էլիտար «էլիտար» շենք»  վերնագրով հոդվածում անդրադարձել էր Նալբանդյան  106 հասցեում գտնվող ոստիկանության տնտեսական վարչության թիվ 1 մանկապարտեզին, որը, կառավարության որոշմամբ, ուղղակի վաճառքի ձեւով օտարվել է «Ավագ Շին» ՍՊԸ-ին:

30-ամյա մանկապարտեզի տեղում ընկերությունը 16-հարկանի շենք է կառուցելու:

Ըստ սոցիալական ցանցերում պտտվող լուրերի, տարածքում գտնվող մի քանի տասնյակ ծառեր պետք է հատվեն:

Այսօր` ժամը 13:00-ին, Նալբանդյան 106 հասցեում տեղի կունենա «Ծառափրկիչ» ակցիան, որի նպատակն է պաշտպանել նախկին մանկապարտեզի տարածքում մնացած ծառերը:

Ակցիայի նպատակն է ցույց տալ, որ քաղաքային իշխանությունների ու բնապահպանությամբ զբաղվող գերատեսչությունների մեղքով քաղաքի կենտրոնում սակավաթիվ ծառերը դարձել են «մահապարտ»:

Գովելի է, որ, արձագանքելով մամուլի հրապարակմանը, քաղաքացիներն ու շենքի բնակիչները պայքարում են անարդարության դեմ` այս կերպ փորձելով ձեւավորել քաղաքացիական հասարակություն: