Նոր օմբուդսմենին պետք է փնտրել հասարակական դաշտում

Մարդու իրավունքների նախկին պաշտպան ԱԺ «Ժառանգություն» խմբակցության պատգամավոր Լարիսա Ալավերդյանը, մամուլի ասուլիսում անդրադառնալով ՀՀ մարդու իրավունքների պաշտպանի հրաժարականին, ասաց, որ այսօր Հայաստանը չունի մարդու իրավունքների պաշտպան, ինչը ՀՀ Սահմանադրության 18-րդ հոդվածի խախտում է:

«Ես դա իշխանության կողմից անարգանք եմ համարում Մարդու իրավունքների հաստատության նկատմամբ, Ի վերջո,  դա իշխանության խնդիրն է, թող հրավիրեին և պարտադրեին Մարդու իրավունքների պաշտպանին` շարունակել իր գործունեությունը եւս 5 օր` մինչեւ ԱԺ առաջիկա նստաշրջանը»,- ասաց նա:

Նախկին օմբուդսմենը խորհուրդ է տալիս նոր պաշտպանին փնտրել հասարակական սեկտորում` հասարակական գործունեությամբ զբաղվող մարդկանց շրջանում, որպեսզի կարողանա ավելի անկաշկանդ աշխատել:  «Նրանք, ովքեր արդեն շփվել են, ավելի անմիջական կապ են ունեցել իշխանությունների հետ, նրանց համար անգամ հոգեբանորեն դժվար է լինել այնչափ ինքնուրույն, որքան պահանջում է օրենքը»,– ասաց Լարիսա Ալավերդյանը։

Պատգամավորին մտահոգում է միայն այն, որ մարդու իրավունքների նոր պաշտպանն ավելի ենթարկվող չլինի: