Որտեղ է թաղված շան գլուխը

Ալիևն օրուգիշեր պատերազմով է սպառնում Հայաստանին, բայց պարզվում է, որ դեռ մի բան էլ մեզ պետք է խաղաղասիրություն ու հանդուրժողականություն սովորեցնել:

Բլոգեր Քրիստինե Պետրոսյանը USAID-ի Հայաստանի և Ադրբեջանի գրասենյակների ինտերնետային կայքերն ուսումնասիրելիս հետաքրքիր մի տարբերություն է գտել:

USAID-ի Հայաստանի գրասենյակի գործողությունների ռազմավարության մեջ նշված է մի կետ, որը չկա Ադրբեջանի գրասենյակի ռազմավարության մեջ:

Այդ կետում ասվում է հետևյալը. «Զարգացնել Հայաստանի կարողությունը` լինել կառուցողական և խաղաղասեր հարևան տարածաշրջանում, խթանել, որպեսզի Հայաստանը խաղաղ կերպով լուծի իր խնդիրները անմիջական հարևանների հետ և  օգնել Հայաստանի կառավարությանը զարգացնել իր խաղաղասիրական պոտենցիալը,…»:

Մեկ այլ բլոգեր` Կարեն Վրթանեսյանը, այսպես է մեկնաբանում վերոնշյալը. «Պարզվում է, որ հայերն ունակ չեն խաղաղ հարևան լինել, և ամերիկացիները պիտի զարգացնեն մեր խաղաղասիրական ունակությունները։ Սա ևս մեկ ապացույց է իմ այն պնդման, որ ամերիկացիների վարած խաղաղասիրական քարոզը հիմնականում միակողմանի է՝ ուղղված է հայերին, բայց ոչ ադրբեջանցի թուրքերին»: