Բազմաթիվ միջազգային կազմակերպություններ միավորվել են ԼՂ հումանիտար իրավիճակը գնահատելու հարցում. ԱԳՆ խոսնակ

Բազմաթիվ միջազգային կազմակերպություններ, կառավարություններ, միջազգային իրավապաշտպաններ միավորվել են Լեռնային Ղարաբաղում հումանիտար լուրջ իրավիճակը գնահատելու հարցում և Ադրբեջանին ուղղված կոչով հանդես եկել: Այս մասին «Թվիթեր»-ում գրել է Հայաստանի ԱԳՆ խոսնակ Անի Բադալյանը: 

«Բազմաթիվ միջազգային կազմակերպություններ, կառավարություններ, միջազգային իրավապաշտպաններ միավորվել են Լեռնային Ղարաբաղում հումանիտար լուրջ իրավիճակը գնահատելու հարցում և կոչ են անում վերացնել Լաչինի միջանցքի շրջափակումը, ինչպես պահանջել էին Արդարադատության միջազգային դատարանը և Մարդու իրավունքների եվրոպական դատարանը»,-նշել է ԱԳՆ խոսնակը: 

Նա ընդգծել է՝ իր հստակ պարտավորությունից շեղվելու փոխարեն Ադրբեջանը պետք է իրականացնի դրանք:                                     

Խոսնակը հիշեցրել է միջազգային մի քանի կառույցների՝ Freedom House-ի, Human Rights Watch-ի, Կարմիր Խաչի միջազգային կոմիտեի հայտարարություններն այս առումով:

Freedom House-ն օրինակ կոչ էր արել ժողովրդավարական կառավարություններին ճնշում գործադրել Ադրբեջանի վրա՝ կոչ անելով վերջ տալ անմեղ քաղաքացիներին կանխամտածված սովամահության հասցնելուց: