ԱՄՆ-ը և Իրանը մտնում են վճռորոշ շրջափուլ JCPOA-ի շուրջ բանակցությունների վերսկսման համար. Գրոսի

Ատոմային էներգիայի միջազգային գործակալության գլխավոր տնօրենՌաֆայել Գրոսին ասել է, որ Միացյալ Նահանգները և Իրանը մտնում են միջուկային գործարքին վերադառնալու բանակցությունների վերակենդանացման կրիտիկական շրջափուլ:

The Washington Post-ին տված հարցազրույցում Գրոսին նշել է, որ Իրանը հրավիրել է իրեն` առաջիկա օրերին հանդիպելու քաղաքական առաջնորդների հետ։

Նա նաև հավելել է, որ մտադիր է քննարկել Իրանի միջուկային ծրագրի մոնիթորինգի խափանման հարցը և այլ հարցեր, որոնք կարող են բարդացնել Գործողությունների համատեղ համապարփակ ծրագրին վերադարձը։

Գրոսին ընդգծել է, որ համաձայնագրի մյուս կողմերը՝ Մեծ Բրիտանիան, Ֆրանսիան, Գերմանիան, Ռուսաստանը, Չինաստանը և Միացյալ Նահանգները, իրեն ասել են, որ շատ դժվար կլինի նման համաձայնության հասնել, քանի դեռ գործակալության վերահսկողությունն ամբողջությամբ չի վերականգնվել:

ԱՄՆ պետդեպարտամենտի խոսնակն ավելի վաղ հայտարարել էր, որ ԱՄՆ-ը մտադիր է շուտով վերսկսել համաձայնագրին վերամիանալու բանակցությունները։ Նեդ Փրայսը ավելացրել էր. «Հուսով ենք, որ նրանց «շուտով» սահմանումը կհամապատասխանի «շուտով»-ի մեր սահմանմանը: Մենք կցանկանայինք, որ Վիեննայում բանակցությունները հնարավորինս արագ վերսկսվեին»: