Չավուշօղլուն կայցելի Մոսկվա՝ թռիչքների վերսկսման հարցը քննարկելու համար

Թուրքիայի արտգործնախարար Մևլյութ Չավուշօղլուն հայտարարել է, որ կայցելի Մոսկվա՝ քննարկելու երկու երկրների միջև թռիչքները վերսկսելու հարցը․ հաղորդում է ՌԻԱ «Նովոստի»-ն:

Չավուշօղլուն նշել է, որ իր այցը տեղի կունենա այն ժամանակ, երբ Թուրքիայում կորոնավիրուսի հետ կապված իրավիճակը նորմալանա: Ըստ նրա՝ այժմ նման ուղևորության իմաստ չկա: Միևնույն ժամանակ, գերատեսչության ղեկավարը շեշտել է, որ Անկարան անպայման պետք է նվազեցնի վիրուսով վարակվելու թիվը Ռամադանի ընթացքում՝ մինչև մայիսի 12-ը:

Թուրք նախարարը նաև ասել է, որ COVID-19-ի դեպքերի աճի պատճառով երկու երկրների միջև թռիչքները սահմանափակելու որոշման մեջ չկա քաղաքականություն: Նա հավելել է, որ Թուրքիան լրացուցիչ սահմանափակումներ է մտցրել, որոնց խախտման դեպքում զբոսաշրջության ոլորտը վտանգված կլինի:

Ապրիլի 15-ին ուժի մեջ է մտել Ռուսաստանի որոշումը`սահմանափակել Թուրքիայի հետ օդային երթևեկությունը։