Մալիում հոսպիտալացրել են պաշտոնանկ արված նախագահին

Մալիում սեպտեմբերի 1-ին մասնավոր կլինիկա են տեղափոխել երկրի՝ պաշտոնանկ արված նախագահ Իբրահիմ Բուբաքար Քեյթային. հայտնում է ՌԻԱ «Նովոստի»-ն:

«75-ամյա Քեյթայի վիճակի մասին տեղեկատվություն չկա»,- նշում է գործակալությունը:

Նաեւ հայտնի չէ, թե արդյո՞ք ներկայիս հանգամանքներում նրան բուժման կտանեն արտասահման:

Ավելի վաղ հաղորդվել էր, որ խռովարարներն ազատ են արձակել իրենց կողմից տապալված նախագահին: Քեյթան տեղափոխվել է մայրաքաղաք Բամակոյի արվարձանում գտնվող Սեբենիկորոյի նստավայր, որը պահպանվում է խռովարարների կողմից:

Մալիում խռովությունը սկսվել է օգոստոսի 18-ին մայրաքաղաք Բամակոյի մերձակայքում գտնվող ռազմաբազայում. խռովարարները հայտարարել են նախագահ Իբրահիմ Բուբաքար Քեյթային եւ վարչապետ Բուբա Սիսեին ձերբակալելու մասին:

Ավելի ուշ նախագահը հայտարարել է պաշտոնաթողության եւ խորհրդարանն ու կառավարությունն արձակելու մասին: Զինվորականները երկրում քաղաքական վերափոխման կոչ են արել, որը տանելու է համընդհանուր ընտրությունների:

Հեղաշրջման կազմակերպիչների՝ օգոստոսի 20-ին հրապարակած հայտարարության մեջ ասվում է, որ անցումային ժամանակաշրջանում Մալին կկառավարի հատուկ նշանակված նախագահը, որը կարող է լինել ինչպես զինվորական, այնպես էլ քաղաքացիական անձ։