Զարիֆը կրկին մեկնաբանել է ԱՄՆ-ի՝ իր դեմ սահմանած պատժամիջոցները

Իրանի ԱԳ նախարար Մոհամադ Ջավադ Զարիֆն ԱՄՆ-ի՝ իր դեմ սահմանած պատժամիջոցները մեկնաբանելու համար հերթական թվիթերյան գրառումն է կատարել՝  նշելով, որ աշխարհի հետ Իրանի ազատ հաղորդակցվելու իրավունքն ԱՄՆ-ի համար սպառնալիք է:

«Մենք լավ ենք գիտակցում, որ Իրանի խաղաղասիրությունը եւ բանակցելու ցանկությունը #Team_B-ի գոյության համար սպառնալիք է»,- հստակեցրել է նա:

«Իմ արտահայտություններն են ԱՄՆ-ի սահմանած պատժամիջոցների պատճառ նշվել»,- հիշեցրել է Զարիֆը՝ հռետորական հարց ուղղելով օգտատերերին. «Իմ արտահայտությունները լսելու կամ ընթերցելու համար ամերիկացի ժողովրդին անհրաժե՞շտ է ստանալ OFAC-ի թույլտվությունը»:

Հիշեցնենք, որ ԱՄՆ-ն օգոստոսի 1-ին հայտարարել է Իրանի ԱԳ նախարար Մոհամադ Ջավադ Զարիֆի դեմ պատժամիջոցներ կիրառելու որոշման մասին: Պատժամիջոցները սառեցնում են Զարիֆի ցանկացած ակտիվությունը ԱՄՆ-ում, կամ դրանք վերահսկվում են ԱՄՆ կառավարական կառույցների կողմից:

ԱՄՆ կառավարությունը հայտարարել է, որ դրանք կսահմանափակեն Իրանի արտաքին քաղաքական գերատեսչության ղեկավարի միջազգային ճանապարհորդությունները: