Բաքվում հայտնի լրագրողին դատապարտեցին ութ տարվա ազատազրկման

Հայտնի ադրբեջանցի լրագրող Աֆղան Մուխթարլին դատապարտվեց ութ տարվա ազատազրկման` մեղադրվելով սահմանն անօրինական հատելու մեջ: Լրագրողի կոլեգաներն ու բարեկամները կարծում են, որ լրագրողին գերեվարել են Վրաստանում և տարել Ադրբեջան: Լրագրողը վերջին երկու տարում բնակվում էր Վրաստանում, նրա գործը մեծ աղմուկ է առաջացրել Ադրբեջանում:

Լրագրողի փաստաբան Էլչին Սադըգովը կարծում է, որ դատարանի վճիռը անօրինական է, հիմնված կեղծ մեղադրանքների վրա, և ենթակա է բողոքարկման: Լրագրող Աֆղան Մուխթարլին իր վերջին խոսքում ասել է, որ դատարանը քաղաքականացված է, իսկ իրեն հետապնդելու և ազատազրկելու հիմնական պատճառը իր մասնագիտական գործունեությունն է` կոռուպցիայի վերաբերյալ հոդվածները: