Այս պահին ընթանում է «Ծառուկյան» դաշինքի և Ծառուկյանի հանդիպումը

Այս պահին ընթանում է «Ծառուկյան» դաշինքի անդամների և Ծառուկյանի հանդիպումը: Քննարկվելու է ինչպես պաշտոնների բաշխման, այնպես էլ պատգամավորության այն թեկնածուների հարցը, ովքեր ինքնաբացարկի դիմում էին ներկայացրել, հետո` վերականգնել իրենց մանդատները:

Քիչ առաջ դաշինքից պատգամավոր ընտրված Վարդևան Գրիգորյանը, մինչ հանդիպման գնալը, լրագրողների հետ զրույցում ասաց, որ նիստի ավարտին պարզ կլինի` ով է իրենց դաշինքից ԱԺ փոխնախագահի թեկնածուն:

Հարցին` ի վերջո, Իշխան Զաքարյա՞նն է լինելու, թե՞ Նաիրա Զոհրաբյանը, նա պատասխանեց, որ երկու թեկնածուներն էլ արժանի են. Իշխան Զաքարյանը ԱԺ փոխնախագահի փորձ ունի, իսկ Նաիրա Զոհրաբյանն էլ բավականին փորձառու քաղաքական գործիչ է:

Գրիգորյանը շտապեց բարձրանալ Ծառուկյանի հետ հանդիպման` խոստանալով, որ նիստի ավարտից հետո ավելի մանրամասն կխոսի բոլոր հարցերի մասին: