Բանտում սրտամկանի կծկում ունեցած Դեմիրթաշին վերջապես տեղափոխել են հիվանդանոց

Թուրքիայում քրդամետ Ժողովուրդների դեմոկրատական  կուսակցության համանախագահ Դեմիրթաշը վերջապես տեղափոխվել է հիվանդանոց:

Ըստ CNNTurk-ի՝ Դեմիրթաշը հիվանդանոցում է մնացել 3 ժամ՝ անցնելով մի շարք ստուգումներ, որից հետո կրկին տեղափոխվել է բանտ: Նրա առողջական վիճակի մասին դեռևս տեղեկություններ չեն հաղորդվում:

Հիշեցնենք, որ Դեմիրթաշը ձերբակալվել է նոյեմբերի 4-ին: Իշխանությունները նրան, համանախագահ Ֆիգեն Յուքսեքդաղին և կուսակցության ևս 8 պատգամավորների կալանավորել են՝ ահաբեկչության քարոզչություն իրականացնելու մեղադրանքով:

Քրդամետ կուսակցության խոսնակ Այհան Բիլգենը օրեր առաջ հայտարարել էր բանտում Դեմիրթաշի առողջության վատթարացման մասին՝ նշելով, որ համապատասխան մարմինները մերժում են նրան հիվանդանոց տեղափոխելու՝  փաստաբանների պահանջը: