Ըստ ՀՀԿ-ականի` գազի եւ էլեկտրաէներգիայի գների իջեցումը կհանգեցնի իշխանության նկատմամբ վստահության բարձրացման

Այսօր լրագրողների հետ զրույցում ՀՀԿ խմբակցության քարտուղար Գագիկ Մելիքյանն անդրադարձավ նոր կառավարության նախաձեռնած բարեփոխումներին: Նրա խոսքով` բարեփոխումները մեկնարկել էին սահմանադրական փոփոխություններով ու ամրապնդվել ՀՀ նախագահի ելույթի հիմնադրույթներով: Առաջնահերթությունը տրված է տնտեսական օբյեկտիվ օրենքներին, և առաջիկայում կարելի է ակնկալել լուրջ տեղաշարժ` տնտեսական աշխուժության առումով:

Գագիկ Մելիքյանը կողմ է կրճատումներին, որովհետև տնտեսության համար կարևոր ազդեցություն չէին ունենում այն աշխատատեղերը, որոնք հավելյալ արժեք չէին ստեղծում:

«Հետագա քայլերում մենք կտեսնենք նաև գազի ու էլեկտրաէներգիայի սակագների նվազեցում, ինչն իր ազդեցությունը կունենա ինչպես տնտեսության աճի բնագավառում, այնպես էլ իշխանությունների նկատմամբ հանրության վստահության բարձրացման առումով»,- ասաց պատգամավորը:

Սոցիալական բնագավառում Գագիկ Մելիքյանը մատնանշեց ՀՀ նախագահի երեկվա խորհրդակցությունը պաշտպանության նախարարի հետ: Լուրջ միջոցներ կուղղվեն մարտական գործողություններում զոհված զինվորների, սպաների ընտանիքների սոցիալական վիճակի և հաշմանդամություն ունեցող զինվորների սոցիալական վիճակի բարելավմանը:

Պատգամավորը խոսեց նաև Թալիշի դպրոցի ու մանկապարտեզի վերանորոգման ու Թալիշի վերաբնակցեման նպատակով բացված հիմնադրամի մասին: «Բավական լուրջ գումարներ արդեն հավաքագրվել են այդ ֆոնդում: Աջակցենք այդ գումարների հավաքագրմանը` Թալիշի դպրոցի ու մանկապարտեզի դպրոցի վերականգնման  համար»,- կոչ արեց Գագիկ Մելիքյանը: