Սարգսյանն ակնկալում է, որ Պետերբուրգում կողմերն, ի վերջո, պայմանավորվածության կհանգեն

Վերջին մի քանի տարիները ցույց են տվել, որ բանակցային պրոցեսը շատ, թե քիչ արդյունավետ կարող է լինել, եթե կողմերը կատարում են իրենց պարտավորությունները։ Այսինքն` իրենց գործողությունները համահունչ են դարձնում 94 և 95թթ. Կնքված հրադադարի համաձայնագրի դրույթներին։ Այս մասին, Times.am-ի հաղորդմամբ, Սանկտ Պետերբուրգում հայտարարել է ՀՀ նախագահ Սերժ Սարգսյանը՝ պատասխանելով լրագրողների այն հարցին, թե ինչ ակնկալիք ունի Ռուսաստանի և Ադրբեջանի ղեկավարների հետ եռակողմ հանդիպումից։

«Վիեննայում մայիսի 16֊ին համանախագահների հայտարարությունը ևս այդ մասին է խոսում։ Ակնկալում եմ, որ Սանկտ Պետերբուրգում մենք, ի վերջո, կպայմանավորվենք, և Ադրբեջանը կկատարի իր պարտավորությունները, սահմաններում խախտումներ չեն լինի, և մենք կշարունակենք բանակցային պրոցեսը Լեռնային Ղարաբաղի խնդրի լուծման լավ նպատակով»,֊ ասել է երկրի ղեկավարը։

 Աղբյուրը՝ Times.am