ՊՆ-ում պաշտոնանկությունները փետրվարի 12-ի շարունակությունն են. Վահրամ Բաղդասարյան

ՀՀԿ խմբակցության ղեկավար Վահրամ Բաղդասարյանն այսօր լրագրողների հետ զրույցում անդրադարձավ ԼՂՀ ՊԲ նախկին հրամանատար Սամվել Բաբայանի կողմից հնչեցված քննադատություններին, որոնք մեծ մասամբ ուղղված էին իշխանություններին: «Սամվել Բաբայանին ճանաչում եմ` որպես ռազմական գործչի: Չեմ ուսումնասիրել ելույթները, բայց տեսել եմ, տեսնում եմ միայն ռազմական գործիչ, որպես քաղաքական գործչի` նրան չեմ ճանաչում: Ավելի լավ կլիներ, որ քառօրյա պատերազմի ժամանակ տեղում լիներ, խորհուրդ տար, թե այդ թերություններն ինչպես վերացնել»,-  ասաց նա:

Անդրադառնալով ՊՆ-ի բարձրաստիճան պաշտոնյաների ձերբակալությանը` Բաղդասարյանը նշեց, որ դա փետրվարի 12-ի` ՀՀ նախագահ Սերժ Սարգսյանի հայտնի ելույթի շարունակությունն էր:

«Դրանք ուսումնասիրություններ  են, որոնք պետք է շարունակվեն և պետք է լինեն ոչ միայն պաշտպանության ոլորտում, այլև բոլոր ոլորտներում, և եթե կան քրեորեն պատժելի գործողություններ, պետք է  պատժվեն»,- եզրափակեց ՀՀԿ-ականը: