Սուրիկ Խաչատրյանի որդու խափանման միջոցը փոխելու հարցով կոմիտեն դիմել է դատախազությանը

ՀՀ քննչական կոմիտեն միջնորդություն է ներկայացրել գլխավոր դատախազությանը՝ մայիսի 2-ին Գորիսի Սդղի գյոլ կոչվող տարածքում տեղի ունեցած միջադեպի գործով կալանավորված` Սուրիկ Խաչատրյանի որդու՝ Տիգրան Խաչատրյանի խափանման միջոցը փոխելու հարցով: Այս տեղեկությունը yerkir.am-ի հետ զրույցում հաստատեց գլխավոր դատախազի խորհրդական Քրիստինե Մելքոնյանը:

Նշենք, որ վերջին օրերին լրատվամիջոցներում ակտիվորեն քննարկվում է Տիգրան Խաչատրյանի ազատ արձակման հարցը: Բանն այն է, որ այս գործով մեղադրյալ` կալանավորված Յուրիկ Մանուչարյանը Տիգրան Խաչատրյանի կալանավորվելուց հետո ցուցմունք է տվել` նշելով, որ Հարություն Զաքարյանի աչքին ոչ թե Տիգրանն է հարվածել, այլ ինքը: Ըստ լուրերի՝ այս ցուցմունքից հետո Յուրիկ Մանուչարյանի եւ Հարություն Զաքարյանի միջեւ առերես հարցաքննություն է տեղի ունեցել, որի ժամանակ Հարությունը չի պնդել, որ Տիգրան Խաչատրյանն է հարվածել իր աչքին:

Եվ քանի որ Տիգրան Խաչատրյանի մեղադրանքի հիմքում դրվել է հենց Հարություն Զաքարյանի ցուցմունքը, չի բացառվում, որ առաջիկայում այս հիմքով էլ Տ. Խաչատրյանն ազատ արձակվի: