Ճարպոտ սնունդն ամռանն օրգանիզմում սթրեսային վիճակ է ստեղծում

Շոգ եղանակին բնակչությունը պետք է էականորեն վերանայի իր վարքագիծն ու սովորույթները: Այսօր լրագրողների հետ զրույցում ասաց ՀՀ ԱՆ հիվանդությունների վերահսկման և կանխարգելման ազգային կենտրոնի շրջակա միջավայրի հիգիենայի բաժնի պետ Աիդա Պետիկյանը:

Ըստ նրա` մարդիկ պետք է նաև իրենց սննդակարգը փոխեն և սկսեն ավելի թեթև սնունդ կիրառել, հարկավոր է խուսափել ճարպերից, որոնք օրգանիզմում ամռանը սթրեսային վիճակ են ստեղծում: «Շոգը նպաստում է մանրէների բազմացմանը, այդ իսկ պատճառով էլ պետք է սնունդը լավ լվանալ, առավել ևս` կանաչիները, միրգն ու բանջարեղենը: Հատուկ պահպանման պայմաններ պահանջող սննդամթերքը պատահական տեղերից չպետք է գնել: Ուշադիր եղեք սունկ գնելիս»,- ասաց Պետիկյանը:

Նա խորհուրդ տվեց օրվա ընթացքում անպայման երեք լիտր հեղուկ օգտագործել՝ հիմնականում ջուր, ինչպես նաև թթու համով ըմպելիքներ` թան, կիտրոնի հյութ /տնական պայմաններում սարքած/: