Նախարարը 5 տոկոս պահումներ անելու հրահանգ չի՞ տվել

Թե ինչպես է բնապահպանության նախարար Արամ Հարությունյանը վերաբերվում ԱԺ ոչ իշխանական ուժերի` կառավարությանն անվստահություն հայտնելու մտադրությանը, նա ցուցադրեց` ուսերը թափ տալով, ապա խորհուրդ տվեց այդ հարցն ուղղել ոչ իշխանական ուժերին ու հեռացավ:

Իսկ մինչ այդ նա լրագրողներին ասաց, թե տեղյակ չէ` իր ղեկավարած գերատեսչությունում պարտադիր կուտակային կենսաթոշակային համակարգի համար աշխատակիցներից 5 տոկոս պահումներ արվե՞լ են, թե՞ ոչ: Այսօր` կառավարության նիստից հետո, նախարարը լրագրողներին ասաց, սակայն, որ ինչպես կարգն է պահանջում, այնպես էլ շարժվում են: Նա հավելեց, որ որեւէ հրահանգ չի տվել` նախարարությունում այս հարցում հրահանգով չեն շարժվում, ինքը մանրամասն չգիտի, թե այդ գործընթացներն ինչպես են իրականացվում, սակայն հավաստիացրեց, թե որեւէ միջամտություն չի կիրառվել այդ գործընթացում:

«Եթե անհրաժեշտություն կա, մենք կարող ենք ճշտել ու այդ տեղեկատվությունը տրամադրել: Այստեղ որեւէ խնդիր չկա, որեւիցե ստիպողական գործառույթ չկա, եւ եթե դա իրականացել է, ապա տրամաբանության եւ օրենքների շրջանակներում»,- նշեց նախարարը: