Հայկական հարցը և ԱՄՆ նախագահի թեկնածուները

ԱՄՆ նախագահի թեկնածուների շրջանում արդեն սովորություն է դարձել նախընտրական քարոզարշավի շրջանակներում բարձրացնել Հայոց ցեղասպանության հարցը, իսկ ընտրվելուց հետո այն ուրանալ:

Շաբաթավերջին  Միացյալ Նահանգների Հանրապետական կուսակցության ներկայացուցիչները Այովա նահանգում առաջին նախնական քվեարկությունն են անցկացրել՝ 2012 թվականի ընտրություններում նախագահի իրենց թեկնածուին որոշելու համար: Պայքարի դուրս եկած մոտ մեկ տասնյակ թեկնածուների շարքում առավելագույն ձայներ հավաքել է Կոնգրեսի  անդամ Միշել Բաքմանը, ով ավելի վաղ բազմիցս աջակցություն է հայտնել Հայոց ցեղասպանությունը ճանաչող բանաձեւերին, ընդ որում` կոնգրեսականը եղել է նաեւ Հայոց ցեղասպանությունը ճանաչող բանաձեւերից մեկի համահեղինակը, որը կոչ է անում ԱՄՆ նախագահին իր ամենամյա ուղերձներում «որպես ցեղասպանություն բնորոշել 1.5 միլիոն հայերի սպանդը»: