Պաշտոնական Բաքուն ուսումնասիրում է Մեդվեդեւի առաջարկները

Պաշտոնական Բաքուն ուսումնասիրում է Ռուսաստան նախագահ Դմիտրի Մեդվեդեւի առաջարկները, որոնք երեկ ներկայացրել է ՌԴ արտգործնախարար Սերգեյ Լավորովը, եւ մանրակրկիտ ծանոթացումից հետո պատասխան կտա. այսօր ադրբեջանցի լրագրողներին ասել է Ադրբեջանի ԱԳ նախարար Էլմար Մամեդյարովը:

Ըստ նրա` համանախագահ երկրները հասկանում են, որ տարածաշրջանում ստեղծված ստատուս քվոն պահպանելն անընդունելի է:

«Ներկայումս հակամարտության կողմերն աշխատում են փաստաթղթի վրա, որի հիմքում Մադրիդյան նորացված սկզբունքներն են, եւ Հայաստանը պետք է հասկանա, որ այդ աշխատանքը պետք է շարունակվի առանց զգացմունքների: Առաջին հերթին Հայաստանը պետք է զորքերը դուրս բերի օկուպացված շրջաններից, ինչը կհանգեցնի տարածաշրջանում կայունության հաստատմանը, իսկ դա ձեռնտու է հենց Հայաստանին»,- ասել է նախարարը:

Նշենք, որ Մամեդյարովը հուլիսի 17-18-ն այցելելու է Ռուսաստան: