Արցախը պետք է բանակցող կողմ դառնա

Երբ Արցախյան հիմնախնդրի կարգավորման վերաբերյալ փաստաթղթեր են ստեղծվում, ապա դրանց մշակման փուլին պետք է մասնակցի նաեւ Արցախի Հանրապետությունը:

Խոսքը վերաբերում է նաեւ Մադրիդյան սկզբունքներին, որոնց պատրաստմանը ԼՂՀ-ն ոչ միայն չի մասնակցել, այլեւ ԵԱՀԿ Մինսկի խումբը փաստաթուղթը պաշտոնապես չի ներկայացրել ԼՂՀ-ին, որն, ի դեպ, հակամարտության անմիջական կողմն է: Պատճառն այն է, որ Արցախը չի մասնակցում բանակցություններին:

Այսօր լրագրողների հետ հանդիպման ժամանակ ԼՂՀ նախագահ Բակո Սահակյանն ասաց, որ Հայաստանը բանակցում է, որպեսզի ԼՂՀ-ն նույնպես բանակցային գործընթացի դերակատարներից մեկը դառնա. «Հայաստանը չի թաքցնում, որ բանակցությունների շրջանակներում առաջնահերթ նշանակություն է տալիս այդ ձեւաչափի վերականգնմանը, հետեւաբար, ես կարծում եմ, որ գործադրվող ջանքերը արդյունք կտան, եւ Արցախը կմասնակցի բանակցություններին»,- ասաց Բ. Սահակյանը: