Խոսակցություններում չեմ ասել մի բան, որի համար կարող եմ ամաչել. Վանեցյան

ՀՀ Ազգային անվտանգության ծառայության տնօրենը համոզված է, որ առաջիկայում կհայտնաբերվեն ու պատասխանատվության կենթարկվեն իր, ՀՀ վարչապետի պաշտոնակատար Նիկոլ Փաշինյանի և ՀՔԾ պետ Սասուն Խաչատրյանի հեռախոսազրույցը գաղտնալսած անձինք: Այս մասին այսօր լրագրողների հետ զրույցում ասաց  ԱԱԾ տնօրենն Արթուր Վանեցյանը:

«Քննչական կոմիտեում ընթանում է քրեական գործ, որի շրջանակներում գաղտնալսման հետ կապված բոլոր հարցերի պատասխանները կտրվեն: Խոսակցությունները մոնտաժված են, դա կապացուցվի նաև փորձաքննությամբ: Ես երբևէ իմ խոսակցություններում չեմ ասել որևէ բառ, որից կարող եմ ամաչել: Ընդհակառակը` գաղտնալսումները լույս սփռեցին այն ամենի վրա, ինչ կատարվում է: Քննչական կոմիտեն այս աշխատանքները կիրականացնի, և ես համոզված եմ, որ առաջիկայում գաղտնալսումներ իրականացրածները կհայտնաբերվեն ու կկրեն օրենքով նախատեսված իրենց պատիժը»,- ասաց Վանեցյանը՝ գաղտնալսումը որակելով ստոր արարք, և որ պատրաստ է պատասխանատվություն կրել, եթե որևէ ժամանակ ինչ-որ բանի համար անհրաժեշտ կլինի:

Ի դեպ, ԱԱԾ տնօրենը չմեկնաբանեց հարցը, թե գաղտնալսումներում նախկին իշխանությունների մատն է խառը: