Մենք պետք է ունենանք համարժեք ընդդիմադիր ուժ` գոնե մեկը կամ երկուսը. ՀՀԿ-ական պատգամավոր

ՀՀԿ-ական պատգամավոր Լևոն Մարտիրոսյանն այսօր լրագրողների հետ հանդիպման ընթացքում, խոսելով վարչապետ Կարեն Կարապետյանի նշանակման մասին, իր գոհունակությունը հայտնեց այդ կապակցությամբ: «Դեռ վաղ է արդյունքներից խոսել, բայց ասեմ, որ վարչապետի նշանակումը դրական սպասելիքներ է առաջացրել ժողովրդի մեջ: Նրա գիտելիքները, աշխատանքային փորձն իսկապես հույս են ներշնչում»,- ասաց ՀՀԿ-ական պատգամավորը:

Մարտիրոսյանը նաև խոսեց ՏԻՄ ընտրությունների մասին: Նա ընդգծեց՝ որքան էլ որոշ համայնքերում ընդդիմադիր քաղաքական ուժերի ներկայացուցիչները հաջողություն գրանցած լինեն, միևնույն  իշխանություններին հավասար ռեսուրսներ չունեն: «Ոչ միայն ՏԻՄ ընտրությունների կոնտեքստում, այլև՝ առհասարակ, ընդդիմադիր ուժերը չունեն հավասարաչափ ռեսուրսներ, որոնք ունի իշխող քաղաքական ուժը: Մինչև ընդդիմությունը չունենա համապատասխան ռեսուրսներ, մեր ժողովրդավարությունը կատարյալ չի լինի ու չի կայանա: Մենք պետք է ունենանք համարժեք ընդդիմադիր ուժ` գոնե մեկը կամ երկուսը: ՏԻՄ ընտրությունների արդյունքներով` կարող է մեկ կամ երկու համայնքում մեկ կամ երկու ընդդիմադիր ուժ հաղթել: Այդպես եղել է նաև անցյալում: Իշխող ուժը չունի կոնկրետ մրցակից»,- ասաց ՀՀԿ-ականը: