Ստոկհոլմում Թուրքիայի դեսպանատան կից տարածքում ոգեկոչել են Հայոց ցեղասպանության 101-րդ տարելիցը

Երեկ Ստոկհոլմում Թուքրիայի դեսպանատան կից գտնվող Dag Hammarskjölds պողոտայում շվեդահայությունը բողոքի ցույց է անցկացրել`  ի հիշատակ Հայոց ցեղասպանության 101-րդ տարելիցի` դատապարտելով ցեղասպան Թուրքիայի վարած ժխտողական քաղաքականությունը:

Yerkir.am-ի հետ զրույցում ՀՅԴ-ական Սարգիս Տեկիրմենճյանը նշեց, որ ցույցը կազմակերպել էր Շվեդիայում հայկական միությունները համադրող մարմինը` համագործակցելով Շվեդիայում ՀՅԴ միությունների հետ:

Ցույցի ավարտից հետո շվեդահայությունը Ստոկհոլմի Սուրբ Հակոբ եկեղեցում մասնակցել է Ապրիլյան Նահատակաց ոգոկոչման պատարագին և բարեխոսական կարգին` Հայոց ցեղասպանության 101-րդ տարելիցի կապակցությամբ:

Պատարագի ավարտից հետո բազմաթիվ շվեդահայեր ցույցը շարունակել են Ստոկհոլմի Sergel Torg հրապարակում: Տեկիրմենճյանը նշեց, որ դաշնակցական երիտասարդների բուռն ու աշխույժ կոչերը ավելի են ոգևորել տասնյակ ասորիների, ովքեր մասնակցել են հիշյալ ցույցին: