Ուժ չգործադրելը կարող է պատասխանատվության առաջ կանգնեցնել ոստիկանին. գլխավոր դատախազ

Սարյան փողոցում օրեր առաջ տեղի ունեցած միջադեպի ժամանակ բռնությունների ենթարկված մի շարք անձինք դիմել են դատախազություն: Այս մասին այսօր լրագրողների հետ հանդիպման ժամանակ հայտարարեց ՀՀ գլխավոր դատախազ Գևորգ Կոստանյանը:

«Սարյան փողոցում տեղի ունեցած միջադեպի մասով համապատասխան ցուցում է տրված: Այն անձինք, ովքեր կդիմեն և կհայտնեն իրենց նկատմամբ տեղի ունեցած բռնության մասին, մենք,  համապատասխանաբար, քննություն կիրականացնենք»,-ասաց նա և հավելեց. «Իրավական գնահատական պետք է տրվի նաև այն անձանց գործողություններին, ովքեր բռնություն են կիրառել ոստիկանների նկատմամբ»:

Ընդհանուր առմամբ, անդրադառնալով ոստիկանների կողմից բռնություն գործադրելու դեպքերին` դատախազն ասաց. «Ես կարող եմ միանշանակ ասել հետևյալը` ոստիկանի կողմից ֆիզիկական ուժ գործադրելը ոստիկանի գործառույթների մեջ է մտնում: Շատ դեպքերում ուժ չգործադրելը կարող է պատասխանատվության առաջ կանգնեցնել»:

Մանրամասները` yerkir.am-ի տեսանյութում: