Թևոսիկի եղբոր սպանության գործով ձերբակալված կա. ոստիկանությունը հաստատեց

Փետրվարի 3-ին ոստիկանության գլխավոր վարչության Երևան քաղաքի վարչության ՊՊԾ գնդի ծառայողները,  համատեղ իրացնելով ստացված օպերատիվ տեղեկությունները,  Երևան քաղաքի Մաշտոցի պողոտայի և Խորենացի փողոցի խաչմերուկից Արթուր Սաֆարյանի սպանությունը կատարելու կասկածանքով քրեական հետախուզության գլխավոր վարչություն են բերման ենթարկել 1969 թվին ծնված Իսրայել Սարգսյանին: Այս մասին yerkir.am-ին հայտնեցին ոստիկանությունից:

Ըստ ոստիկանության` Սարգսյանի մոտից անձնական խուզարկությամբ հայտնաբերվել և առգրավվել է «Բերետա» տեսակի ատրճանակ, որն ուղարկվել է ոստիկանության փորձագիտական վարչություն: Իսրայել Սարգսյանը ձերբակալված է, նախաքննությունը շարունակվում է:

Հիշեցնենք, որ Արթուր Սաֆարյանը սպանվել է հունվարի 27-ին: Նա քրեական աշխարհում հայտնի Կայարանցի Թևոսիկի հարազատ եղբայրն է: